Thought: ...Hòmber emansipá.

Meskos ku e muhé a evolushoná i emasipá… tal e hòmber.

Mi ta realisá i mi ta kontentu.
Mi ta felis i mi aseptá ken mi ta… komo hòmber.

Sin duda i sigur.

Mi ta realisá di por duna na abo o kualke muhé loke e meresé.

M’a krese bira ken mi ta.

Hòmber.

Konsiente mi ta aseptá ku mi mester di abo… muhé.

M’a lanta den mi kultura machista.
A siñami fo’i chiki ku ta hòmber mi ta, pues sinti, ekspresá i
yora, ta kos di muhé.

Rebelde manera mi ta, m’a tene mi mente habri, pa siña i sigui eksplorá.

Ku añanan m’a krese i deskubrí.
Ku mi ta hòmber, no paso mi ta manera abo komo muhé ke pa mi ta.
Sino paso ta ken mi ta.

Hòmber.

Sin tin mester di sintimi intimidá pa e muhé ku a emansipá.
Paso mi sa ken mi ta komo hòmber.

Sigur i tòg ku mi dudanan.
Kisas ku miedu de bes en kuando… pero ku e kurashi pa sinti i eskpresá.
Pa stima i evolushoná.
Sigui siña i emansipá.

I mi ta konsiente di e importansia di mi relashon ku Dios na promé luga’ i
riba tur kos.

Mare tur hòmber por a sa ku ta ei e sekreto ta.
Pa yega i entregá bo mes, manera bo ta i humildemente
pidi Papa Dios… yudami… guiami… bendishonami.

Ku tempu m’a siña skucha, m’a siña obedesé.
M’a deskubrí kon dushi sabiduria por ta.
Kuantu pas e ta trese i kon trankil mi por ta.

Di ta hòmber, den un mundu ku ta evolushoná.
Den un mundu kamindá muhénan ta emansipá.
Opiná i progresá.

M’a siña sinti i eskpresá.
M’a siña stima… e muhé tal manera e ta.

M’a emansipá!

Sin pèrdè mi identidat, komo hòmber den e mundu di muhenan emansipá.

Awe m’a regresá, den mi kultura machista.
I m’a bin topa muhénan emansipá.
Ku’n por keda kla dikon nos hòmber den nos kultura machista no ta realisá.

Kiko nan… komo muhé… ke o ken nan ta.

Ku nos, komo hòmber… mester siña skucha.
Siña stima, kompartí i konbibí, sin tin mester di konkurí.

Entrega.
Habri i pèrmití nos mes di ta nos mes.

Hòmber!
Ku tambe ta sinti.
Ku tambe por ta insigur.
Ku no ta pèrfekto!

Si komo hòmber mi tin e nesesidat na defendé o proba mi mes riba algu
ku mi sa ku mi no ta, kisas ta paso mi tin miedu o mi ta insigur di ken mi ta.
M’a lanta den mi kultura machista.
Pordonami, muhé.

M’a lanta mira…
Mas muhé afo mi tin… mas macho mi ta.
Mas yu afo mi tin… mas hòmber mi ta.

I tempu a bai lagami.

Ami hòmber… un po’ keda kla, ku mi mes.
Ku mi emoshonnan.
Ku mi sintimentunan.
Ku mi duda i miedunan.

Pordonami, muhé.
Ku mi’n po’ tei pa bo.

Pa skucha i realisá.

Ku abo mi muhé… a emansipá.
B’a krese.
B’a traha.
Bo ta gana mas.
Bo ta karga responsabilidat.
Bo ta lider.
Bo ta stima.
Bo ta kuida.
Bo ta mama.
I tòg bo ta bo mes.

Bo ta kompliká... mi muhé.

“Ai, mihó mi dal un biter na snèk… que alli este papi, siempre es bienvenido!”

Tur problema a solushoná, pa un ratu.
Mientras tantu abo muhé ta sigui emansipá.
Sigui krese, biba… resa… kuida… guia… sinti… i traha!

Hòmber puntra bo mes… mi ke?
Mi sa?
Realmente mi ta stima… e muhé?
Mi ke?

Awe m’a regresá i mi ta puntra mi mes…

E muhé den nos kultura machista a realisá, ku tin hòmber ku a emansipá?
Pa tiki kisas ku nan ta….

Ku a siña stima i entregá.

Dediká.
Pashoná.
Simpel.

Manera mester ta.

O kisas e muhé ta pensa ku ta mariku eseinan ta?

Komo hòmber mi por komprondé…
Ku si di 12 apel putrí tin 3 ku ta bon,… ku ta un poko straño for di lo komun o loke abo muhé den nos kultura machista a kustumbrá kuné…
Mi por komprondé ku kisas abo muhé por duda, si di bèrdè e 3 nan ei ta bon di bèrdè. Kisas bo hasta sintibo intimidá.

Ta miedu, kisas?
Paso ya b’a kome 4 ku tabata puntrí kaba!
I… kon bo biré ta apel tur ta!

Kisas ainda bo’n realisá ku tin hòmber ku a emansipá.

I awo’ e ela siña dunabo afekto.
Sirbibo komo muhé.
Sintibo komo ser…
E ke skucha i purba komprondé.

Abo, muhé.

Komo ser.
Komo amiga.
Komo muhé.

Sin intenshon tur biaha pa tin algu mas o simplemnete sex.

Muhé, ami komo hòmber ke pa bo ta liber.
Pa bo ta bo mes.

Paso si bo no ta…
Kon ami komo hòmber por kompletá abo komo muhé.

Loke abo falta, mi ke duna.
Loke ami falta, bo ta duna.

P’esei Dios a krea.
Abo komo muhé i ami komo hòmber.

Diferente i uniko.
Inpèrfekto!
Sinembargo nos por ta ún!

Mi ta aseptá…
Mi mester di bo, muhé.
Mi’n ta kuestioná naturalesa.

P’esei mi ke skucha.
Ekspresá i ta… hòmber!
Spiritual, emoshonal, fuerte, sensibel, ku kurashi, bunita, inpèrfekto…

P’esei mi ke siña tur dia pa ta un mihó hòmber!

Pa abo.
Pero promé… pa mi mes.

Morgan – 08 Mrt 07
Ta abo muhé… a inspirá!